مصر المأذن .. بقلم .. الشاعر جهاد بدر

هاتعيش بحبك ومهما هاتبعد
هاتلقى ترابها ينادى عليك
تشرق تغرب هاتفضل فى بالك
هاتفضل بشوقك و إسأل عينـيك

بنيلها و سمارك و كل الصحارى
و لو تقدر إبعد بشوقك ودارى
بنبتة نسيمها فى وقت العصارى
ساعات الطفوله فى كل الحوارى

دى مصر اللى لسه بوقت المغارب
بتلقى اللى فيها يدافع يحارب
غنيه بولادها و كل الحبايب
و إسأل تاريخها و قلبى يجاوب

مصر المأذن بتفطر معانا
و تسجد تصلى بكل المساجد
هاتلقى الكنايس و عيد القيامه
و رحمة ولادها و الكل ساجد

جرب تخونها و خون الامانه
هاتلقى جوارحك كارهه اللى فيك
ياللى بولادك و أهلك وناسك
لو كان دا طبعك مين يشتريك

ولع شموعك و إبنى لولادك
شيد و زين فى نجوم سماك
قبلى و بحرى و بأرض سينا
و حارب عدوك لو يوم نهاك

دى هى اللى لينا من بعد ربك
جنان التمنى حصون الأمان
قوم يـ اللا بينا خلينا نفرح
و يبكوا اللى خانوا طول الزمان