أنا و الناى بالعامية المصرية للشاعر جهاد بدر

أنا و الناى نقول مواويل
و تملى الزلعه أسرارنا

نبوس الشمس فى جبينك
و تفدى الدمعه أعمارنا

يا مصر و دمعتك غاليه
بتلعن فينا أعذارنا

صوانى زمان كانت بتدور
تعشى الناس فى دوارنا

و تحت الشجره بالقمرايه
مجالس صُلح زوارنا

ولو كانوا يقولوا فى يوم
هاتكبر بينا أسوارنا

و نلقى خناجر هنا بتدور
ما كنا بنينا أسوارنا

و لا سرقنا من الغلبان
و لا شجعنا تُجارنا

كتير تُجار من الأوزار
سكنوا ظلام بأجوارنا

و شافوا دموع كما الأمطار
و عشق الدمع أعمارنا

أنا الإنسان أنا الماضى
و ليه للماضى أسفارنا

و ليه النار ما بين أوكار
بتحرق حتى فى ديارنا

يا مصر يرن خلخالك
تدوب فى هواك أحجارنا

و لو نقسى عليكى بيوم
نلاقى الوحل فى ديارنا

جهاد بدر