المشربية .. بقلم الشاعر جهاد بدر

النيل بيغسل فى السواد
و أنا من سوادك باشتكى

و المشربيه منوره مليون سنه
بتُـطل عـ المادنه بنظرتى

لسه السحور قبل الفطور
و لاَّ فطرتوا بدمعتى

لساها مريم فى الكتاب
و حروف كتابى دُنيتى

مين كاد ليوسف بالسنين
أصل العجاف بقوا ضحكتى

لسه الأمان بين البشر
و الرحمه وسط محبتى

موسى هناك واقف كليم
و الطور أمين على كلمتى

لو دمعه منى زلزلت
و إزاى تزلزل دمعتى

أصل الجماد بين العباد
عمره ما يسمع كلمتى

مين اللى يسمع صوت أدان
وييجى يحرق جنتى

وسط الظلام هامسك شموع
يمكن أنور سِكتى

عصفور و فارد فى السما
لو تقدر إقتل نخوتى

إبنى إحتسبته عند ربى
و ربه عالم شكوتى

هز الجدار ولعها نار
الضلمه مش هاتهزنى

لسه حليم فى كل دار
و التوته واقفه فى ضلتى

من ساقيه نبتى هايرتوى
بإسم اللى موت قسوتى

رب العباد يوم التناد
و الفصل يومها فى دعوتى