الكلام ألوان بقلم الشاعر جهاد بدر

ساعات الكلام لحبيب
يهواه و يهوانى

و ساعات الكلام ألوان
و كتير بيعصانى

تلمع عيون الليل
و ساعات بتنسانى

ساعات أناجى عيون
ترتاح بوديانى

تداوى وجع أيام
و القاها مخاصمانى

فارد ضفاير الليل
و العشق سُلطانى

أغازل جمال العين
و هواه فى أشعارى

و إزاى أنام الليل
و جراح محاوطانى

يا لعبة المواويل
موجوعه ألحانى

ياما عـ الورق غنيت
و ضحكت لأيامى

و رسمت الشجر بالغيط
و الغصن منانى

هجرِّت طيور أوكار
و حبيب بأحضانى

زى النسيم بربيع
و الضحكه عاجبانى

بكل الفصول عايشين
و حبيبى يهوانى

يا ستاير النسيان
عمره ما ينسانى

لو قسيت الأيام
هـ القاها عاشقانى

و القى النسيم أوتار
و العزف يحلا لى

و يرقص كما الألحان
و يفرح بوديانى