ليل الشتا

موضوع: ليل الشتا الأحد ديسمبر 22, 2013 9:39 pm

يا شمس ليه ضلتك رسمت فى القلوب ضلمه تنهش عظام البشر لا بيت ولا لمه
يموت بن ادم فى شتا وحلمه كان غلبان ومين مننا مات ومين اللى كان سجان

حلم بفرشه فى الدفا تحن وتضمه ليل الشتا طول لا سقف يزيح همه
والف اه من وجع فى بحر ملهش امان يا برد الشتا ميل ابعد عن الغلبان

يا ريت اشوف الربيع والشمس فى حضنى او انى اكون مسكين مرتاح ومتهنى
تعالا نعيش حلمنا يمكن اخوك مستنى نزرع محبه وسطنا نبعد عن الاحزان

يا كل القلوب الطيبة والفرشة والألوان تعالوا نرسم حلمنا يمكن يكون غلبان
تعالا نعيش حلمنا اخوك هنا مستنى نقدر ندور على الامل يمكن يكون له مكان

يا أرض يا طيبة نتوضا ونصلى لساك يا أرضنا ليكِ فى كتابنا مكان
تعالا نزرع ارضنا يمكن نلاقى امان بسمة فى وش اخوك تزرع من القيراط فدان

جهاد بدر