ابنى

موضوع: ابنى الجمعة ديسمبر 06, 2013 5:51 pm

مين يصفى دم اخوه وهو فاكر إن ده جايز يكون هو الامان
ياللى عصيت ليه قتلت الفرحه فى عيون الصغير قبل الاوان

ابنى دافع عن ترابه مات بيبكى عليه سلاحه كان يقوم وقت الادان
ابنى راجل لما يضرب عينه تيجى فى عين عدوه والعدو هو الجبان

ياللى شربت الدم وحدك ابنى عايش عند ربه حى يرزق فى امان
انت جاني والقصاص عند ربك ييجى في يوم يخبط على البيبان

لما أنسى دم ابنى لما اشوف القسوة تبنى لما أبكى على الزمان
يا صبر شايفه فوق جبين الامهات يعدى باولادها بالايمان

ياما شربنا من ألم وعمر روسنا ما انحنت لا بقتيل ولا كفن
رحمه تاهت عن قلوبنا ماشيه بضلوعك تاريخنا اللى اتسجن

هى دى نخوة رجال لما نسيب القدس ينعى بالانين وبالمحن
مين يا ناس شاف قدس صامد جه يشخبط على الحيطان

ابنى قال الله أكبر عدى جاب النصر أخضر بالسلاح مش بالكلام
ابنى تحت الرايه كبر كان فى كل ادان بيكبر وفى عنيا له حنان

فاكره لما جه الصيام لما ذاكر لما نام لما قولنا كان وكان
لما غنى نشيد بلادى شوفت دمعه من عيونه تلمع وقلبه فيه حنان

لما نادى قال يا أمى ثوره قامت واحنا أمنا لاخواتنا الميدان
قلت يا بنى اياك سلاحك فى وش اخوك يترفع حتى وان كان جبان

قال يا أمى لو قتلته تبقا خابت فرحتى والله يعوض على اللى كان
لسه يا امى الزرع طالع واحنا بسلاحنا نفرد نضلل على الغيطان

ياللى زرعت الشر فى قلوب الطيبين بأى شرع واى دين
ياللى قسمتوا التراب لسه شارون ماندفنش ولا نايم فى الميدان

ولما شوفتك وانت نايم على التراب والدم فى ايدين الجبان
صرخت ابنى ما اتقتلش سلاحه صاحى ماتكسرش فى المكان

ابكى يمكن تتوجع ياللى زرعت الدمع لو فى القلب ذرة من حنان
يمكن تشوف الفرحه بالعيون او بين ضلوعك او حتى فى ركن الزمان

جهاد بدر